અમદાવાદઃ વાયબ્રન્ટ સમિટ વેળા મહાત્મા મંદિર પરિસરમાં અલાયદો ઉભો કરાયેલો મોદી મર્ચન્ડાઈઝ સ્ટોલ જોતાં લાગતું હતું કે જાણે ગુજરાતમાં નરેન્દ્ર મોદીના નામે પ્રચાર શરૂ થઇ ગયો હોય.. આ સ્ટોલમાં ‘નમો ફીર એક બાર’ અને NAMO Againલખેલાં ટી-શર્ટ વેચાઈ રહ્યા હતા. આ જોતાં ચૂંટણી પ્રચારનો માહોલ જીવંત બન્યો હતો.
મહાત્મા મંદિરમાં ૧૧૫ દેશોના પ્રતિનિધિઓની ઉપસ્થિતમાં ગુજરાતમાં મૂડીરોકાણ વિશે પ્રવચનો થઈ રહ્યા હતા ત્યારે બીજી તરફ આ પરિસરમાં મોદી મર્ચન્ડાઈઝ સ્ટોલમાં મુલાકાતીઓને મોદી એપ ડાઉનલોડ કરવા જાણકારી અપાઇ હતી. સ્ટોલમાં રૂ. ૨૦૦માં નમો ટી-શર્ટ, રૂ. ૨૦માં મોદીપેન, રૂ. ૧૮૫માં મોદી ઘડિયાળ અને રૂ. ૨૦૦માં મોદી માસ્ક વેચાઈ રહ્યા હતા. ઘણાં તો મોદી માસ્ક પહેરીને ફોટા પડાવતા હતા. આ ઉપરાંત આ સ્ટોલની પાસે જ રૂ. ૨૫૦૦થી માંડીને રૂ. ૪૦૦૦ સુધીના મોદીકુર્તા વેચાઈ રહ્યા હતા. આમ ગુજરાતમાં રોજગારીના નામે શરૂ થયેલાં વાયબ્રન્ટ ગુજરાતમાં જાણે મોદીનો પ્રચાર થતો હોય તેવો ચૂંટણી માહોલ જામ્યો હતો.
એટલું જ નહીં, વડા પ્રધાન સાથે ફોટો પાડવાની તક મળે તે માટે પિક્ચર વીથ મોદી ઝોન પણ ઊભો કરાયો હતો. જેમાં ડેલિગેટો, મુલાકાતીઓની લાઈન લાગી હતી.