ટાન્ઝાનિયામાં એવોકાડોનાં ઉત્પાદન અને નિકાસમાં તેજી

(ડબલ) Africa / દેશવિદેશ

ડોડોમાઃ ગ્રીન ગોલ્ડ તરીકે જાણીતું ફળ એવોકાડો વિશ્વભરમાં માનીતું બની રહ્યું છે ત્યારે ટાન્ઝાનિયામાં એવોકાડોનાં ઉત્પાદન અને નિકાસમાં તેજી આવી છે. આમ છતાં, મોટા ભાગની પેદાશ નકામી જાય છે. ભારત ટાન્ઝાનિયાના એવોકાડોનું બીજા ક્રમનું સૌથી મોટું ખરીદાર છે. ટાન્ઝાનિયાના એવોકાડોનું 30 ટકા ઉત્પાદન ભારતમાં નિકાસ કરાય છે.

ટાન્ઝાનિયામાં 1890ના દાયકાની શરૂઆતથી એવોકાડોનું ઉત્પાદન લેવાય છે. એવોકાડો ઈન્ડસ્ટ્રીનું બજારમૂલ્ય 2020માં 6.5 બિલિયન યુએસ ડોલર હતું જે 2024માં વધીને 16.24 બિલિયન ડોલર હતું. આ મૂલ્ય 2029માં વધીને 23 બિલિયન યુએસ ડોલર થવાનો અંદાજ છે. ટાન્ઝાનિયાએ ગત બે દાયકામાં આ તક ઝડપી લીધી હતી અને આજે તે ચોથા ક્રમનું સૌથી મોટું એવોકાડો નિકાસકાર છે. પ્રથમ ત્રણ ક્રમે કેન્યા, સાઉથ આફ્રિકા અને મોરોક્કો છે. ટાન્ઝાનિયાના એવોકાડોની સૌથી વધુ નિકાસ યુરોપ (40 ટકા), ભારત (30 ટકા) અને મિડલ ઈસ્ટ (19 ટકા)માં થાય છે. ટાન્ઝાનિયાએ 2013માં 1.9 મિલિયન ડોલરની કિંમતના 1,393 ટન એવોકાડોની નિકાસ કરી હતી જે 2024માં વધીને 79.813 મિલિયન ડોલરની કિંમતના 36,520 ટનની થઈ હતી.

ઉત્પાદન અને નિકાસ વધવા છતાં, ખેડૂતો, ખેડૂતોના સંગઠનો અને કોમર્શિયલ વેરહાઉસીસના જણાવ્યા અનુસાર ટાન્ઝાનિયામાં ઘરઆંગણે એવોકાડો ઉત્પાદન વધવા છતાં, 40 ટકા એવોકાડો ફળને નુકસાન, જીવાત અને રોગના કારણે નકામા જાય છે. નિકાસમાં પણ ક્વોલિટી ધોરણો જળવાઈ ન રહેવાથી ભારે નુકસાન જાય છે. જોકે, 2016 પહેલા નિકાસમાં રિજેક્ટ થયેલો માલ ફેંકી દેવાતો હતો, જે આજે ઓઈલ પ્રોસેસિંગ ફેક્ટરીઝ દ્વારા ખરીદી લેવાય છે.