નાઈજીરિયામાં બોંબ વિસ્ફોટથી ૫૭ લોકોના મોત

જોસઃ નાઇજીરિયાના જોસ શહેરમાં બે બોમ્બ વિસ્ફોટમાં ૫૭ લોકોનાં મોત થયા છે અને ૭૦થી વધુને ઈજા થઇ છે. આ વિસ્ફોટો નમાજ પઢવા આવેલા લોકોથી ભરેલી મસ્જિદમાં અને અમીર મુસ્લિમોથી ભરેલી શગાલિંકૂ રેસ્ટોરામાં થયા હતા. પોલીસે જણાવ્યા મુજબ મસ્જિદમાં મૌલવીનું પણ મૃત્યુ થયું છે. તેઓ અહીં નમાજ પછી શાંતિનો ઉપદેશ આપતા હતા. જોસ ઉત્તર નાઇજીરિયાના મુસ્લિમ અને દક્ષિણ-નાઈજીરિયાના ખ્રિસ્તી સમુદાયના સંગમસ્થાને વસેલું શહેર છે. લાંબા સમયથી આતંકી સંગઠન બોકોહરામના નિશાન પર આ શહેર છે. જોકે આ હુમલાની જવાબદારી કોઈ સંગઠને સ્વીકારી નથી.