વિમાન દુર્ઘટનામાં નાઈજીરીયન આર્મીના વડાનું મૃત્યુ

લાગોસઃ નાઈજીરીયન આર્મીના વડા લેફ્ટનન્ટ ઈબ્રાહિમ અત્તાહિરુનું કડુમામાં વિમાન દુર્ઘટનામાં મૃત્યુ થયું હતું. લશ્કરી અધિકારીઓએ જણાવ્યું હતું કે ખરાબ હવામાનમાં વિમાન લેન્ડિંગ કરવાનો પ્રયાસ કરતું હતું ત્યારે આ દુર્ઘટના સર્જાઈ હતી. તેમાં વિમાનમાં સવાર ક્રૂ મેમ્બર્સ સહિતા દસ અધિકારીઓનું મૃત્યુ થયું હતું.
નાઈજીરીયાના એરફોર્સે જણાવ્યું કે વિમાન કડુમા ઈન્ટરનેશનલ એરપોર્ટ પર ઉતરાણ કરી રહ્યું હતું તે સમયે આ બનાવ બન્યો હતો.
પ્રમુખ મુહામ્દુ બુહારીએ જણાવ્યું કે આ દુર્ઘટનાથી તેઓ અત્યંત દુઃખી છે.  
૫૪ વર્ષીય જનરલ અત્તાહિરુએ લશ્કરના ઉચ્ચ અધિકારીઓમાં થયેલી ફેરબદલીમાં ગયા જાન્યુઆરીમાં જ આ હોદ્દો સંભાળ્યો હતો.
એક દાયકાથી લાંબી જેહાદીઓની બળવાખોરી સામે લડવામાં લશ્કરની કાર્યદક્ષતા વધારવાની સરકારની યોજનાના ભાગરૂપે આ ફેરફાર થયા હતા.