ગુજરાતમાં ફરી કમળ ખીલશેઃ ભાજપ નવો રેકોર્ડ બનાવશે

નવી દિલ્હી: ગુજરાત વિધાનસભાની ચૂંટણી નજીક આવી રહી છે તેમ તેમ રાજકીય પક્ષોની ગતિવિધિ વધી રહી છે. ભાજપે ફરી એક વાર સત્તા મેળવવા માટે કમર કસી છે અને આ માટે વડા પ્રધાન નરેન્દ્ર મોદીથી લઈને ગૃહમંત્રી અમિત શાહ મેદાનમાં ઉતર્યા છે. તો મુખ્ય વિપક્ષ કોંગ્રેસ ઉપરાંત આમ આદમી પાર્ટી ભાજપના વિજયરથને અટકાવવાની નેમ સાથે મેદાનમાં ઉતર્યા છે. પંજાબમાં જ્વલંત વિજય સાથે ‘આપ’ની સરકાર રચનાર અરવિંદ કેજરીવાલે ગુજરાત પર ફોકસ કર્યું છે. અત્યાર સુધીમાં તેઓ રાજ્યમાં અનેક રેલીઓ અને જાહેર સભાઓ કરી ચૂક્યા છે. જોકે વિપક્ષની આ જહેમત છતાં જનમત સર્વેક્ષણનું તારણ કહે છે કે ગુજરાતમાં ફરી એક વખત કમળ ખીલશે, અને ભાજપ વિક્રમજનક બેઠકો જીતીને સરકાર રચશે.
એબીપી ટીવી ન્યૂઝ ચેનલ માટે સી-વોટર દ્વારા થયેલા સર્વેનું તારણ દર્શાવે છે કે ભાજપ ગુજરાતમાં ફરી એક વાર સત્તામાં આવી શકે છે. એટલું જ નહીં તે નવો રેકોર્ડ પણ બનાવી શકે છે. ગુજરાતની 182 વિધાનસભા બેઠકોને 4 પ્રદેશોમાં વહેંચીને ઓપિનિયન પોલ કરવામાં આવ્યો છે. 2017ની ચૂંટણીમાં ભાજપને 99 બેઠકો મળી હતી, પરંતુ આ વખતે વધુ બેઠકો મળવાની આશા છે. બીજી તરફ, કોંગ્રેસ 30 બેઠકો ગુમાવી શકે છે. ગત વખતે પાર્ટીએ 77 બેઠકો જીતી હતી. જ્યારે કેજરીવાલની આમ આદમી પાર્ટી બેથી વધુ બેઠકો જીતે તેવું લાગતું નથી.
ઓપિનિયન પોલમાં રાજ્યની 182 વિધાનસભા બેઠકોમાંથી ભાજપને 135થી 143, કોંગ્રેસને 36થી 44 અને આમ આદમી પાર્ટીને 0-2 બેઠકો મળવાનો અંદાજ છે. અન્યોના ખાતામાં પણ 0-2 બેઠકો આવી શકે છે.
ચોમેર ભાજપ છવાઇ જશે
ઉત્તર ગુજરાતની 32 બેઠકોમાંથી ભાજપને 20-24 બેઠકો, કોંગ્રેસને 8-10 અને ‘આપ’ને 1 બેઠક મળી શકે છે. દક્ષિણ ગુજરાતની 35 બેઠકોમાંથી ભાજપને 27-31 બેઠકો, કોંગ્રેસને 03-07 બેઠકો અને આપને 2 બેઠકો મળી શકે છે. સૌરાષ્ટ્રની 54 બેઠકોમાંથી 38થી 42 બેઠકો ભાજપને, કોંગ્રેસને 11-15 બેઠકો અને ‘આપ’ને એક બેઠક મળી શકે છે. આ ઉપરાંત મધ્ય ગુજરાતની 61 બેઠકોમાંથી 46-50 બેઠકો, ભાજપને 10-14 કોંગ્રેસને અને 1 બેઠક ‘આપ’ને મળી શકે. એકંદરે 182 બેઠકોમાંથી ભાજપ 135-143 બેઠકો, કોંગ્રેસ 36-44 બેઠકો અને ‘આપ’ 2 બેઠકો જીતી શકે છે.
આમ, ભાજપ ગુજરાતમાં ફરી એક વખત સત્તામાં વાપસી કરતી નજરે આવી રહી છે. સી-વોટર તરફથી કરવામાં આવેલા સર્વેએ સ્પષ્ટ કર્યું હતું કે અહીંના લોકો ફરીથી ભાજપની સત્તામાં વાપસી નક્કી કરી રહ્યા છે.
ભાજપ - કોંગ્રેસ બન્નેનો વોટશેર ઘટશે
એબીપી માટે કરાયેલા સર્વે અનુસાર ભાજપને 182 બેઠકો પર 47 ટકા મત મળવાનું અનુમાન છે ત્યારે કોંગ્રેસને 32 ટકા મત મળવાના અનુમાનની શક્યતા છે. આ અંગે પૂરા જોશ સાથે મેદાનમાં ઉતરી રહેલી ‘આપ’ પાર્ટીની બેઠકો ભલે ઓછી હોય પરંતુ તેને 17 ટકા મત મળવાનું અનુમાન છે.
સી-વોટર ઓપિનિયન પોલના સર્વેમાં ગુજરાતમાં ભાજપને આ વખતે વોટ શેયરમાં નુકસાન દેખાઈ રહ્યું છે. 2017ની વિધાનસભાની ચૂંટણીમાં ભાજપને 49 ટકા મત મળ્યા હતા. આ રીતે આ વખતે ઓપિનિયન પોલમાં ભાજપને અંદાજિત 2 ટકા મતના નુકસાનનું અનુમાન છે. ઓપિનિયન પોલમાં કોંગ્રેસને પણ નુકસાન થતું દેખાઈ રહ્યું છે. કોંગ્રેસને ગત વખતે 41 ટકા મત મળ્યા હતા. આ રીતે આ વખતે 10 ટકા મતનું નુકસાન થવાનું અનુમાન છે.
ઓપિનિયન પોલમાં ગુજરાતની જનતાએ વડા પ્રધાન મોદીના કામકાજ પર પણ પોતાનું મંતવ્ય રજૂ કર્યું છે. સર્વેમાં લોકોને પૂછવામાં આવ્યું કે, પ્રધાનમંત્રી તરીકે પીએમ મોદીનું કામકાજ કેવું લાગ્યું. આ સવાલના જવાબમાં 60 ટકા લોકોએ પીએમ મોદીનું કામકાજ સારું લાગ્યું ત્યારે 22 ટકા લોકોને ખરાબ લાગ્યું. આ સિવાય 18 ટકા લોકોએ પીએમ મોદીના કામકાજને સરેરાશ માન્યું.
ઓપિનિયન પોલ અંગે ભાજપના નેતા હાર્દિક પટેલે જણાવ્યું હતું કે ગુજરાતમાં ફરી એક વાર જનતાનો વિશ્વાસ ભાજપ અને પીએમ મોદી પર છે. લોકો માને છે કે જ્યારે ગુજરાતના ગૌરવ અને અને ગૌરવની વાત આવે ત્યારે ભારતીય જનતા પાર્ટી તેમની પડખે ઊભી રહી હોત.
ગુજરાત-હિમાચલ પ્રદેશમાં વિધાનસભાની ચૂંટણીની તૈયારીઓ ચાલી રહી છે. તારીખો કોઈ પણ દિવસે જાહેર કરી શકાય છે. પાર્ટીની જીત સુનિશ્ચિત કરવા માટે દિગ્ગજો પણ મેદાનમાં ઉતર્યાં છે પરંતુ સી-વોટરના ઓપિનિયન પોલમાં ભાજપ અને બંને રાજ્યોમાં વાપસી કરે તેવી શક્યતા છે. આ વખતે ‘આપ’ ત્રીજા ખેલાડી તરીકે જોવા મળશે.
હિમાચલ પ્રદેશમાં પણ કેસરિયો લહેરાશે
ઓપિનિયન પોલીસ મુજબ, છેલ્લી વિધાનસભા ચૂંટણીમાં હિમાચલ પ્રદેશમાં ભાજપે 44 બેઠકો જીતી હતી, જ્યારે કોંગ્રેસને 21 બેઠકો મળી હતી. આ વખતે પણ બંને પક્ષોને 2017ની ચૂંટણીની જેમ બેઠકો મળી શકે છે પરંતુ ગુજરાતમાં કોંગ્રેસને થોડું નુકસાન થવાની ધારણા છે. દાવો કરવામાં આવ્યો છે કે આ સર્વે બંને રાજ્યોની તમામ વિધાનસભા સીટો પર કરવામાં આવ્યો છે.
આ વખતે બંને રાજ્યોમાં ‘આપ’ પણ ચૂંટણીની સંપૂર્ણ તૈયારી કરી રહી છે. બંને રાજ્યોમાં પાર્ટીના ટોચના નેતાઓની ગતિવિધિઓ તેજ થઈ ગઈ છે. લોકોએ ‘આપ’ની નીતિઓની વાકેફ કરવાની સાથે ભાજપ અને કોંગ્રેસ પર તીક્ષ્ણ તીર છોડવામાં આવી રહ્યા છે.
વડા પ્રધાન નરેન્દ્ર મોદીનું ફોકસ અત્યારે સંપૂર્ણપણે ગુજરાત પર છે. તેઓ કોઈ પણ સંજોગોમાં ગુજરાત રાજ્ય પર ભાજપની પકડ ઢીલી કરવા માંગતા નથી. આ માટે તેઓ દિવસ રાત એક કરી રહ્યા છે.