ગુજરાતી ડાયસ્પોરા ‘જીવંત સેતુ’ છે, જે આપણે સૌને જોડીને રાખે છેઃ બ્રિટિશ હાઈ કમિશનર

અમદાવાદઃ ભારત ખાતેના બ્રિટિશ હાઇ કમિશનર એલેક્સ એલિસે તાજેતરમાં બે દિવસની ગુજરાત મુલાકાતે આવ્યા હતા. મુલાકાત દરમિયાન ગુજરાત અને યુકે વચ્ચેના વેપાર-વાણિજ્ય અને રોકાણને વેગ આપવા માટે તેમણે અમદાવાદ અને ગાંધીનગરના વિવિધ બિઝનેસ આગેવાનો તથા સરકારી પ્રતિનિધિઓની મુલાકાત લીધી હતી. તે ઉપરાંત તેમણે ઐતિહાસિક ગાંધી આશ્રમની મુલાકાત લીધી હતી અને નરેન્દ્ર મોદી સ્ટેડિયમ ખાતે યોજાયેલી ભારત-ઇંગ્લેન્ડ વચ્ચેની ટેસ્ટ મેચ પણ નિહાળી હતી.
હાઇ કમિશનર એલેક્સ એલિસે જણાવ્યું હતું કે, ‘હું ખુશ છું કે ભારતમાં આવ્યા બાદ મેં સૌથી પહેલા ગુજરાતની મુલાકાત લીધી છે. ભારતની બહાર વસનારાઓ સૌથી વિશાળ ગુજરાતી ડાયસપોરા માટે યુકે એક ઘર છે. જેમણે યુકેમાં તમામ ક્ષેત્રોમાં પોતાનું અતુલ્ય યોગદાન આપ્યું છે. તેઓ વ્યક્તિ અને વિચારોના એક એવા ‘જીવંત સેતુ’ સમાન છે જે આપણે બધાને જોડે છે. ભારત અને વિશ્વના કેટલાક સૌથી મોટા વેપારધંધા અને સ્ટ્રક્ચર્સ ગુજરાતમાં સ્થિત છે. વિશાળ શિપિંગ યાર્ડ્સ, રિફાઇનરીઝથી માંડીને કચ્છનું રણ અને ગીરના જંગલો જેવી સંપદા ગુજરાતમાં છે. મને વિશ્વાસ છે કે યુકે-ઇન્ડિયા વચ્ચેના સહયોગ માટે અહીં પુષ્કળ તકો છે.’
હાઇ કમિશનર એલેક્સ એલિસે તેમની મુલાકાત દરમિયાન ખાનગી ક્ષેત્રો માટે ક્લાઇમેટ ચેન્જના મુદ્દે કામ કરવાની સોનેરી તક હોવાનું જણાવ્યું હતું. હાલમાં યુકે ગુજરાત રાજ્યમાં અનેક પાર્ટનર્સ સાથે વિવિધ કાર્યો કરી રહ્યું છે. જેમાં અર્બન ડેવલપમેન્ટ, એનર્જી અને સ્ટ્રેટેજિક પાર્ટનરશિપ વગેરેનો સમાવેશ થાય છે.