બજેટ ગુજરાતને ઉત્તમથી સર્વોત્તમ તરફ લઈ જશેઃ રૂપાણી

અમદાવાદઃ બજેટ અંગે પ્રતિક્રિયા આપતા મુખ્ય પ્રધાન વિજય રૂપાણીએ જણાવ્યું હતું કે રૂ. ૨.૨૭ લાખ કરોડનું આ બજેટ દેખાડે છે કે આ બજેટ સર્વાંગી સર્વવ્યાપી છે. જેમાં ગરીબો, ખેડૂતો, યુવાનો, મહિલાઓ, આદિવાસીઓ, પીડિતો-શોષિતોના ઉત્થાન માટેનું છે. શિક્ષણ, કૃષિ, આરોગ્ય, સિંચાઈ અને પીવાના પાણીની વાતને આવરી લેવાઇ છે. બજેટમાં તમામ વિભાગોને આવરી લેવાયા હોવાથી આ બજેટ ગુજરાતને ઉત્તમથી સર્વોત્તમ તરફ લઈ જશે. ૯૦ લાખ આદિજાતિના લોકો માટે પાંચ વર્ષમાં ૧ લાખ કરોડ રૂપિયા ફાળવાયા છે.
આવક ઘટી છતાં સરાકરે વધુ નાણાં ફાળવ્યાંઃ પાટિલ
ભાજપના પ્રદેશ પ્રમુખ સી. આર. પાટીલે બજેટ અંગે પ્રતિક્રિયા આપતા કહ્યું કે, રૂ. ૨.૨૭ લાખ કરોડનું આ બજેટ ગુજરાતના તમામ ભાઈબહેનો માટે ઉપયોગી થશે. શિક્ષણ અને ખેડૂતો માટે વધુ નાણાંની ફાળવણી થઈ છે. કોરોનાને કારણે સરકારની આવક ઘટી હોવા છતાં વિકાસના એક પણ કામ અટક્યા નથી. એટલું જ નહીં, આ બજેટમાં લોકોને વધુ સુવિધા અને રાહત આપવામાં આવી છે. ધારાસભ્યોની બંધ કરાયેલી ગ્રાન્ટ સેવાને ફરીથી આપવાનું નક્કી કરાતા ગરીબ લોકો માટે તે આશીર્વાદ બનશે.