વાઈબ્રન્ટ સમિટ ૨૦૧૯ના MOUમાં રૂ. ૨૯,૪૦૦ કરોડનું મૂડીરોકાણ

અમદાવાદઃ વાઈબ્રન્ટ ગુજરાત ગ્લોબલ ઇન્વેસ્ટમેન્ટ સમિટ ૨૦૧૭ અને ૨૦૧૯માં જે એમઓયુ થયા છે તે પૈકી કેટલા ઉદ્યોગોએ કેટલું મૂડીરોકાણ કર્યું છે તે સંદર્ભે કોંગ્રેસે ગુજરાત વિધાનસભામાં લેખિત સવાલો કર્યાં હતાં. આ પ્રશ્નોના જવાબમાં રાજ્ય સરકારે જણાવ્યું હતું કે, વર્ષ ૨૦૧૭ના એમઓયુમાં ૧ લાખ ૯૫ હજાર કરોડનું મૂડીરોકાણ થયું છે. જ્યારે વર્ષ ૨૦૧૯ની સમિટમાં થયેલા એમઓયુમાં રૂ. ૨૯,૪૦૦ કરોડનું મૂડીરોકાણ રાજ્યમાં થયું છે. ૩૧મી ડિસેમ્બર ૨૦૧૯ની સ્થિતિના આ આંકડા હોવાનું રાજ્યના ઉદ્યોગ વિભાગે જણાવ્યું છે. વર્ષ ૨૦૧૯ના એમઓયુમાં સૌથી વધુ સુરત જિલ્લામાં ૫,૩૭૧.૮૩ કરોડનું મૂડીરોકાણ થયું હોવાનો સરકારે દાવો કર્યો છે. આ ઉપરાંત વડોદરા જિલ્લામાં રૂ. ૩૭૭૬ કરોડ, રાજકોટમાં રૂ. ૧૯૬૭ કરોડ મોરબીમાં રૂ. ૨૯૫૩ કરોડનું મૂડીરોકાણ થયું છે.