વિધાનસભામાં બે કેસમાં આરોપીઓને ક્લિન ચીટ

ગાંધીનગરઃ કચ્છના નલિયા સેક્સકાંડની તપાસકર્તા જસ્ટિસ એ. એલ. દવે કમિશનનો રિપોર્ટ ૨૬મીએ વિધાનસભામાં રજૂ થયો હતો. ઓગસ્ટ ૨૦૧૫થી નવેમ્બર ૨૦૧૬ વચ્ચે કચ્છમાં યુવતી પર ભાજપના સ્થાનિક નેતા-કાર્યકરોએ વારંવાર ગેંગરેપની ઘટના બહાર આવી હતી. તપાસ પંચે રિપોર્ટમાં જણાવ્યું કે વારંવાર નોટિસ, સેક્સ રેકેટની સીડી અને બ્લેક મેઈલિંગનો આરોપ મૂકનાર પીડિતા કે અન્ય તરફથી સચોટ પુરાવા ન મળતા આરોપીઓને ક્લિન ચીટ અપાઈ છે. અન્ય એક કેસમાં અમદાવાદના મોટેરા સ્થિત આસારામ આશ્રમમાં ૧૧ વર્ષ પહેલાં પિતરાઈ ભાઈઓ દીપેશ  અને અભિષેકના રહસ્યમય મોત થયા હતા. આ કેસમાં તપાસ પંચ રચાયું હતું. તપાસપંચે ૨૬મી જુલાઈએ વિધાનસભામાં રિપોર્ટ આપ્યો કે, બંને બાળકોનાં શરીરમાંથી અંગ ગુમ થયાનું સ્વીકાર્યું, પરંતુ આ અંગો તાંત્રિક વિધિ માટે ગુમ થયાનું સાબિત થતું ન હોવાથી બંને બાળકોનાં મોત ડૂબવાથી હોવાનું તારણ આપ્યું હતું. આશ્રમની બેદરકારીથી મૃત્યુ થયાનો રિપોર્ટ આવતાં આશ્રમના માલિકો આસારામ-સાંઇ નિર્દોષ જાહેર થયા હતા!