સિનિયર સિટિઝનનું પેન્શન સીધું બેન્ક એકાઉન્ટમાં જમા થશે

અમદાવાદઃ કેન્દ્ર સરકારની ગાંધી ઓલ્ડ એજ પેન્શન યોજના અને ગુજરાત સરકારની વયવંદના યોજનામાં સિનિયર સિટિઝનને મળતી પેન્શનની રકમ મની ઓર્ડરથી ચૂકવવામાં આવતી હતી. આ પેન્શનના પૈસા હવે સીધા લાભાર્થીના બેન્કના ખાતામાં જમા થશે. ગુજરાત રાજ્યમાં સવા લાખ સિનિયર સિટિઝન આ સહાયનો લાભ મેળવે છે. જ્યારે અમદાવાદ જિલ્લામાં ૪૫ હજાર સિનિયર સિટિઝનને આ સહાયનો લાભ મળે છે. રાજ્ય સરકાર દ્વારા પ્રથમ તબક્કે વયવંદના યોજનાની રકમ બેન્ક ખાતામાં જમા થશે. જો આ યોજના સફળ થશે તો સરકાર તરફથી મળતી વિધવા સહાય, વિકલાંગ સહાય, પાલક માતા-પિતા યોજના વગેરે જેવી યોજનાની સહાય પણ લાભાર્થીના બેન્ક ખાતામાં જ જમા થશે. સરકાર તરફથી મળતી સહાય યોજનામાં થતી ગેરરીતિ અટકાવવા માટે આ વ્યવસ્થા ઊભી કરાઈ છે.