ભાવનગરઃ બોટાદ તાલુકાના દાડવા ગામની આ વર્ષ ૧૯૯૧ની ઘટના છે. પીડિતાની ફરિયાદ હતી કે, પતિ ભાવનગર ખરીદી કરવા ગયા ત્યારે ઘરમાં આ એકલી મહિલાને આરોપીઓ ઉપાડી ગયા. ત્રણ કિ.મી દૂર વાડીમાં તેની પર રેપ કરાયો. ઉપરાંત તેના પતિને ધમકાવીને પાંચ દિવસ કેદ કરાયો હતો. પાંચમા દિવસે પતિ નાસી છૂટ્યો હતો. આ ઘટનામાં કુલ ૮ વ્યક્તિઓ સામે આરોપ હતા, પરંતુ આટલા લાંબા સમયમાં ત્રણ કથિત આરોપીના મૃત્યુ થયા હતા. વર્ષ ૧૯૯૧ની કથિત ગેંગરેપની આ ઘટનામાં નીચલી અદાલતે ૨૪ વર્ષ બાદ ૨૦૧૫માં ચુકાદો આપતાં પાંચ આરોપીને ૧૦ વર્ષની સખત કેદ અને રૂ. ૧ લાખ જેટલો દંડ ફટકાર્યો હતો. જેની સામે આરોપીઓએ હાઈ કોર્ટમાં અપીલ કરી અને હાઈ કોર્ટે નીચલી અદાલતના ચુકાદાને ખામીયુક્ત ઠેરવતાં રદ કરીને આરોપીઓને નિર્દોષ જાહેર કર્યાં.
