રાજકોટઃ શહેર ઉપર આભ ફાટ્યું હોય તેમ નવમી ઓગસ્ટે દે ધાનધન ૧૮ ઈંચ (૪૪૮ મિમી) તોફાની વરસાદ વરસતા શહેરમાં સર્વત્ર જળબંબાકાર થઈ ગયો હતો. તમામ માર્ગો ઉપર ગોઠણથી કમરડૂબ પાણીને કારણે વિવિધ વિસ્તારો જુદા જુદા ટાપુના સમૂહ બની ગયા હોય તેમ જનજીવન થંભી ગયું હતું.
સેંકડો મકાનોમાં પાણી ભરાતા સત્તાવાર રીતે ૧૦૦૦ લોકોનું સ્થળાંતર કરાયું છે. ભારે વરસાદને કારણે અંડરબ્રિજ સહિત તમામ રસ્તાઓ જળબંબાકાર બની ગયા હતા. નીચાણવાળા વિસ્તારોમાંથી ૧૦૦૦ લોકોનું સલામત સ્થળે સ્થળાંતર કરાયું હતું. મહાપાલિકા, પોલીસ, જિલ્લા વહીવટી તંત્ર તથા એનડીઆરએફની ટીમો દિવસ દરમિયાન દોડતી રહી હતી. રાજકોટવાસીઓ માટે ૧૮ ઈંચ વરસાદ કહીં ખુશી, કહીં ગમ સમાન બની રહ્યો હતો.
