૮૧ પદયાત્રીઓમાં માત્ર ૫ મહિલા

અમદાવાદઃ વડા પ્રધાન નરેન્દ્ર મોદીએ આઝાદીના અમૃત મહોત્સવની ઉજવણીનો પ્રારંભ સાબરમતી આશ્રમથી દાંડીયાત્રાને પ્રસ્થાન સાથે કરાવ્યો હતો.
૫ એપ્રિલ સુધી ચાલનારી આ ૨૭૨ કિલોમીટની દાંડી યાત્રામાં રાજ્યભરના કુલ ૮૧ પદયાત્રીઓ જોડાયા છે. અમદાવાદથી દાંડી સુધીની આ પદયાત્રામાં જોડાનારા ૮૧ પદયાત્રીમાંથી ૩૪ સ્પોર્ટ્સ કોચ છે.
આ સિવાય ૧૯ સામાજીક કાર્યકરો, ૮ વિદ્યાર્થીઓ, ૪ ખેલાડી, ૩ બિઝનેસમેન, ૩ ફિઝિયોથેરપિસ્ટ, ૩ કૃષિ ક્ષેત્ર સાથે સંકળાયેલા, ૩ ખાનગી કંપનીમાં નોકરી કરનારા, ૧ શેફ, ૧ યોગ શિક્ષક અને ૧ ઈલેક્ટ્રિક કન્સલ્ટન્ટનો સમાવેશ થાય છે. જોકે, આ ૮૧ પદયાત્રીઓમાં માત્ર પાંચ મહિલાઓ છે.
આ ઉપરાંત ૫૦થી વધુ વયના માત્ર એક પદયાત્રી છે. અમદાવાદ જિલ્લામાંથી ૭ પદયાત્રીઓ આ દાંડી યાત્રામાં જોડાયા છે.
૧૯૩૦ની ઐતિહાસિક દાંડી કૂચની જેમ જ આ પદયાત્રીઓ અસલાલી-નવાગામ-માતર-નડિયાદ-આણંદ-બોરસદ-કનકરપુરા-કારેલી જેવા સ્થળે રાત્રિ રોકાણ કરશે. ૧૨ માર્ચ ૧૯૩૦થી શરૂ થયેલી દાંડી યાત્રામાં છેક સુધી ભાગ લીધો હોય તેવા ૭૯ પદયાત્રીઓ હતા.