બાબરના સેનાપતિ મીર બાકીએ 1 માર્ચ 1528ના રોજ રામજન્મભૂમિ પરના મંદિરને તોપના ગોળાઓથી ધ્વસ્ત કરી દીધું. 497 વર્ષ, સાત મહિના અને 22 દિવસ પછી રામ ભક્તો માટે તે સુવર્ણ અને નિર્ણાયક ક્ષણનું મંગળવારે આગમન થયું હતું. આ દિવસે વડાપ્રધાન નરેન્દ્ર મોદીના હાથે ભવ્ય રામ મંદિરના સુવર્ણ શિખર પર ધ્વજારોહણ થયું હતું.
રામજન્મભૂમિ સંઘર્ષની કહાણી જોઇએ તો, 9 નવેમ્બર 2019ના રોજ રામલલાની તરફેણમાં સર્વોચ્ચ અદાલતનો નિર્ણય આવ્યો તેના થોડા સમય પહેલાં સુધી પણ મંદિર બનશે જ, તે અંતિમરૂપે કહી શકાયું ન હતું. 464 વર્ષ બાદ 6 ડિસેમ્બર 1992ના રોજ મસ્જિદનું રૂપ ધારણ કરેલા વિખંડિત ભવનમાંથી મુક્તિ તો મળી. તેમ છતાં રામલલાને પછીના 27 વર્ષ સુધી તંબુના હંગામી મંદિરમાં રહેવું પડયું હતું. રામભક્તોને તો કામચલાઉ મંદિરની પરિકલ્પના પણ રાહત આપવા લાગી હતી. જોકે આજે અયોધ્યામાં રામજન્મભૂમિ ન્યાસે સાડા ત્રણ દાયકા પહેલાં જે મંદિરની કલ્પના કરી હતી, તેનાથી પણ વિશાળ અને ભવ્ય મંદિર સાકાર થયું છે.
અભિજીત મૂહુર્તની 44 મિનિટમાં ધર્મધ્વજ લહેરાયો
જ્યોતિષીઓ અને પંડિતોના મતે, મંગળવારે અભિજીત મુહૂર્ત દરમિયાન રામ મંદિર પર ધ્વજ ફરકાવવામાં આવ્યો હતો, આ સમય હતો 11:45થી બપોરે 12:29 વાગ્યા સુધી. ભગવાન રામનો જન્મ આ અભિજીત મુહૂર્ત દરમિયાન થયો હતો, તેથી રામ મંદિરમાં ધ્વજ ફરકાવવા માટે આ સમય નક્કી થયો હતો.
રામ મંદિરમાં ધર્મ ધ્વજ ફરકાવવા માટે 25 નવેમ્બરનો દિવસ શા માટે પસંદ કરાયો છે? આ સવાલના જવાબમાં અયોધ્યાના સંતો કહે છે કે, ભગવાન રામ અને માતા જાનકીના લગ્ન ત્રેતાયુગમાં માર્ગશીર્ષ મહિનાના શુક્લ પક્ષના પાંચમી તિથિએ વસંત પંચમીના દિવસે થયા હતા. 25 નવેમ્બર, વિવાહ-પંચમી લગ્ન માટે સૌથી શુભ દિવસ છે.
આ ધર્મધ્વજ શા માટે વિશેષ?
રામ મંદિર પર ફરકાવાયેલો કેસરી રંગનો ધ્વજ 22 ફૂટ લાંબો અને 11 ફૂટ પહોળો છે. ધ્વજદંડ 42 ફૂટ ઊંચો હશે. તે 161 ફૂટની ઊંચાઈ પર ફરકાવાયો છે. ધ્વજ પર ત્રણ પ્રતીકો પણ ચિહ્નિત થયેલ છે: સૂર્ય, ૐ અને કેદાર વૃક્ષ. આ ધ્વજ સૂર્ય ભગવાનનું પ્રતીક માનવામાં આવે છે.
સનાતન પરંપરામાં, કેસરી રંગને ત્યાગ, બલિદાન, બહાદુરી અને ભક્તિનું પ્રતીક માનવામાં આવે છે. રઘુવંશ વંશના શાસનકાળ દરમિયાન પણ આ રંગનું વિશેષ સ્થાન હતું. કેસરી રંગ જ્ઞાન, બહાદુરી, સમર્પણ અને સત્યના વિજયનું પ્રતિનિધિત્વ કરે છે.
