ઇન્ડિયન ઇન્સ્ટિટ્યૂટ ઓફ સાયન્સ ભારતની શ્રેષ્ઠ સંસ્થા

નવી દિલ્હીઃ ઇન્ડિયન ઇન્સ્ટિટ્યૂટ ઓફ સાયન્સ (આઇઆઇએસ) બેંગ્લૂરુએ ફરી એક વાર દેશની સર્વશ્રેષ્ઠ યુનિવર્સિટી અને સાઉથ એશિયામાં ઉભરતી યુનિવર્સિટીનો ખિતાબ જીતી લીધો છે. દેશમાં આઈઆઈટી-મુંબઈ બીજા સ્થાને અને આઈઆઈટી-દિલ્હી ત્રીજા સ્થાને રહી છે. આઠ અને નવ જૂને લંડનમાં જારી થયેલા ક્યૂએસ વર્લ્ડ યુનિવર્સિટી રેન્કિંગ - 2023માં ઇન્ડિયન ઇન્સ્ટિટ્યૂટ ઓફ સાયન્સ - બેંગ્લૂરુ વિશ્વભરની ઉચ્ચ શિક્ષણ સંસ્થાઓમાં 155મા સ્થાને રહી છે. ઉલ્લેખનીય છે કે વર્ષ 2022ના લિસ્ટમાં ઇન્ડિયન ઇન્સ્ટિટ્યૂટ ઓફ સાયન્સ - બેંગ્લૂરુ વિશ્વમાં 186મા ક્રમે રહી હતી. આમ એક જ વર્ષમાં તેના રેન્કિંગમાં મોટો સુધારો થયો છે.
આઇઆઇએસ-બેંગ્લૂરુએ સંશોધન મોરચે 100 ટકા સ્કોર હાંસલ કર્યો છે. રેન્કિંગ 2023 વિશ્વની ટોચની 200 સંસ્થામાં આઇઆઈટી-મુંબઈ અને આઈઆઈટી-દિલ્હીને પણ સ્થાન મળ્યું છે. રેન્કિંગ 2013માં ભારતની 12 યુનિવર્સિટીના રેન્કિંગમાં સુધારો જોવા મળ્યો છે તો 10નું રેન્કિંગ કથળ્યું છે. 12 યુનિવર્સિટીની સ્થિતિ યથાવત્ રહી છે. ક્યૂએસ વર્લ્ડ યુનિવર્સિટી રેન્કિંગ - 2023માં મેસ્ચ્યુસેટ્સ ઇન્સ્ટિટ્યૂટ ઓફ ટેકનોલોજી (એમઆઇટી) સતત 11મા વર્ષે ટોચના સ્થાને રહી છે.