નવી દિલ્હીઃ એમેઝોને ભારતમાં આર્ટિફિશ્યલ ઇન્ટેલિજન્સ (એઆઇ) અને ક્લાઉડ ઇન્ફ્રાસ્ટ્રક્ચરના વિસ્તરણ માટે વધારાના 13 બિલિયન ડોલરનું રોકાણ કરવાની યોજના જાહેર કરી છે, જેનાથી 2026 અને 2030 દરમિયાન દેશમાં તેનું કુલ રોકાણ 48 બિલિયન ડોલર થઈ જશે. 2025માં એમેઝોને ભારતમાં તેના તમામ વ્યવસાયોમાં 35 બિલિયન ડોલરના રોકાણની જાહેરાત કરી હતી. આ વધારાના 13 બિલિયન ડોલર મુંબઈ અને હૈદરાબાદમાં એમેઝોન વેબ સર્વિસ (એડબ્લ્યુએસ) ડેટા સેન્ટર ક્ષમતા વિસ્તારશે, જેનાથી સ્ટાર્ટઅપ્સ, સાહસો અને સરકારી સંસ્થાઓને કસ્ટમ એઆઇ ચિપ્સ, એઆઇ સેવાઓ, સુરક્ષિત તથા વિશ્વસનીય ક્લાઉડ ટેક્નોલોજી અને ડેવલપર ટૂલ્સની એક્સેસ મળશે, જેથી તેઓ ઝડપથી નવીનતા લાવી શકે, વધુ પ્રગતિ કરી શકે અને વૈશ્વિક સ્તરે ગ્રાહકોને સેવા આપી શકે.
એમેઝોનના સીઇઓ એન્ડી જેસી ગયા ગુરુવારે વડાપ્રધાન નરેન્દ્ર મોદીને મળ્યા હતા. જેસીએ કહ્યું, ‘એક દાયકા કરતાં વધુ સમયથી અમે અમારા વિવિધ વ્યવસાયો દ્વારા ગ્રાહકો, વેચાણકર્તાઓ, વિકાસકર્તાઓ, સ્ટાર્ટઅપ્સ અને સાહસોને સેવા આપી રહ્યા છીએ. ખાસ કરીને અમારા ઈ-કોમર્સ, એઆઇ અને ક્લાઉડ વ્યવસાયોમાં મજબૂત વૃદ્ધિ સાથે પ્રતિભાવ જબરદસ્ત રહ્યો છે. એમેઝોન એઆઇ ઇન્ફ્રાસ્ટ્રક્ચર પર મોટો ખર્ચ કરી રહ્યું છે.
ભારતની પ્રાથમિકતાઓ સાથે સુસંગત
જેસીએ કહ્યું કે, ‘જેમ જેમ આપણે ભારતમાં એમેઝોનનો વિકાસ કરીએ છીએ, અમારી વ્યવસાયિક પ્રાથમિકતા એઆઇની એક્સેસને લોકશાહીકરણ, નાના વ્યવસાયોનું ડિજિટાઇઝેશન, નોકરીઓ બનાવવા અને નિકાસને સક્ષમ બનાવવાની ભારતની પ્રાથમિકતાઓ સાથે સુસંગત બનાવવાનું છે. ભારતની મજબૂત માગને પહોંચી વળવા અમે આગામી પાંચ વર્ષમાં ભારતમાં 48 બિલિયન ડોલરથી વધુનું રોકાણ કરી રહ્યા છીએ. અમે વડાપ્રધાન મોદીના વિકાસ અને આત્મનિર્ભર ભારતના વિઝનથી પ્રેરિત છીએ, અમે ભારતની વૃદ્ધિમાં લાંબા ગાળાના ભાગીદાર બનવા માટે પ્રતિબદ્ધ છીએ.’
