દાર્જિલિંગઃ ગોરખા જનમુક્તિ મોરચા દ્વારા અલગ ગોરખાલેન્ડની માગણી મુદ્દે છેલ્લા કેટલાક દિવસથી પશ્ચિમ બંગાળમાં વિવિધ સ્થળે હિંસા અને તોફાનો થાય છે. આ તોફાનો અને હિંસા અટકાવવા માટે જ ૧૫મીએ પોલીસે પશ્ચિમ બંગાળમાં વિવિધ સ્થળે દરોડા પાડયા હતા. ખાસ કરીને ગોરખા જનમુક્તિ મોરચાના નેતાને ત્યાં દરોડા પાડયા પછી મામલો વધારે ગંભીર થયો હતો. પોલીસને આ દરોડામાં ૪૦૦ જેટલાં હથિયારો મળી આવ્યા હતા. પોલીસે તમામ હથિયારો જપ્ત કરીને આગળની કામગીરી હાથ ધરી હતી. ઉલ્લેખનીય છે કે, તાજેતરમાં જીજેએમ દ્વારા અનિશ્ચિત મુદતની હડતાળની જાહેરાત કરવામાં આવી હતી.
