નવી દિલ્હી: પાટનગરના મુખ્યમંત્રી અરવિંદ કેજરીવાલની ધરપકડના વિરોધમાં વિપક્ષના ગઠબંધન INDIAએ રામલીલા મેદાનમાં ‘લોકશાહી બચાવો’ રેલી યોજી હતી. સભાને સંબોધતા કોંગ્રેસ નેતા રાહુલ ગાંધીએ કહ્યું કે, ‘પીએમ મોદી આ ચૂંટણીમાં મેચ ફિક્સિંગનો પ્રયાસ કરી રહ્યા છે. 400ને પાર કરવાનો આ તેમનું સ્લોગન છે, તે મેચ ફિક્સિંગ વિના 180ને પાર નહીં કરી શકે. કોંગ્રેસ પાર્ટી વિપક્ષમાં સૌથી મોટી પાર્ટી છે. અમારા તમામ બેંક ખાતા બંધ કરી દેવાયા છે. કેમ કે તમે ઈચ્છો છો કે મેચ ફિક્સ થાય, બંધારણ રદ થાય અને તમે સત્તામાં રહો.’
આ મહારેલીમાં વિપક્ષી એકતા ઊડીને આંખે વળગતી હતી. રેલીમાં સોનિયા ગાંધી સહિત એનસીપી (શરદચંદ્ર પવાર), શિવસેના (ઉદ્ધવ ઠાકરે), તૃણમૂલ કોંગ્રેસ, સમાજવાદી પક્ષ, સીપીઆઇ (એમ), સીપીઆઇ, મહેબૂબા મુફ્તીની પીડીપી , નેશનલ કોન્ફરન્સ, ઝારખંડ મુક્તિ મોરચાના નેતા હાજર હતા.
આ મહારેલીમાં મુખ્યમંત્રી અરવિંદ કેજરીવાલનાં પત્ની સુનીતા કેજરીવાલે ઇડીની કસ્ટડીમાંથી પતિ દ્વારા જારી કરાયેલો સંદેશ વાંચતા કહ્યું કે, અત્યાચાર નહીં ચાલે. અરવિંદ કેજરીવાલને લાંબો સમય જેલના સળિયા પાછળ રાખી નહીં શકાય. તેમણે છ ગેરંટી પણ વાંચી હતી. સુનીતાએ લોકોને પૂછ્યછયું કે ભાજપ મુખ્યમંત્રી કેજરીવાલના રાજીનામાની માંગ કરી રહી છે, શું તેમણે રાજીનામું આપવું જોઈએ? તે સિંહ છે. તેઓ તેને લાંબા સમય સુધી જેલના સળિયા પાછળ રાખી શકશે નહીં.
કોંગ્રેસ પ્રમુખ મલ્લિકાર્જુન ખડગેએ કવિતા દ્વારા ભાજપ પર આકરા પ્રહારો કર્યા. તેણે કહ્યું, ‘તમે જ અપીલ છો, તમે જ દલીલો છો, તમે જ સાક્ષી છો, તમે જ વકીલ છો, તમે જેને ચાહો તેને હરામ કહો, જેને ચાહો તેને હલાલ કરો. આરજેડી નેતા તેજસ્વી યાદવે કહ્યું, ‘દેશમાં સૌથી મોટો દુશ્મન બેરોજગારી, મોંઘવારી અને ગરીબી છે. વડાપ્રધાન મોદીએ કોઈ નોકરી આપી નથી.
