પેટા-ચૂંટણીમાં કોંગ્રેસનો હાથ ઉપર

નવી દિલ્હીઃ પૂર્વોત્તરના ત્રણ રાજ્યોની વિધાનસભા ચૂંટણીની સાથે સાથે દેશના વિવિધ રાજ્યોમાં યોજાયેલી વિધાનસભાની પેટા-ચૂંટણીઓમાં કોંગ્રેસ માટે રાહતના સમાચાર છે. તેણે મહારાષ્ટ્ર અને પશ્ચિમ બંગાળમાંથી ભાજપ અને ટીએમસી પાસેથી એક-એક બેઠક આંચકી લીધી છે. તમિલનાડુમાં ડીએમકેના સમર્થનથી તેણે બેઠક જાળવી છે. ભાજપ અને તેના સહયોગી એજેએસયુને મહારાષ્ટ્ર અને ઝારખંડમાં એક-એક બેઠક મળી છે. પશ્ચિમ બંગાળમાં સત્તારૂઢ ટીએમસીને સાગરદિઘીમાં આંચકો મળ્યો છે. કોંગ્રેસના બેરોન બિસ્વાસે ટીએમસીના ઉમેદવારને 22,986 મતોથી પરાજય આપ્યો હતો. કોંગ્રેસની રાજ્યમાં આ એકમાત્ર વિધાનસભા બેઠક છે.
બીજી બાજુ મહારાષ્ટ્રના પૂણેમાં ચિંચવાડ બેઠકને ભાજપે જાળવી રાખી છે. જોકે કાસબા પેઠ બેઠક કોંગ્રેસના રવિન્દ્ર ધાનગેકરે ભાજપ પાસેથી આંચકી લીધી છે. આ બેઠક ભાજપ 28 વર્ષથી જીતતો હતો. એજેએસયુ પાર્ટીના ઉમેદવાર સુનિતા ચૌધરીએ ઝારખંડના રામગઢ બેઠક જીતી લીધી છે. તેમણે કોંગ્રેસના બજરંગ માહતોને 21,970 મતોથી પરાજય આપ્યો હતો.