ભારતને એમટીસીઆરમાં સ્થાન મળ્યુંઃ ચીન, પાકિસ્તાન હાથ ઘસતાં રહી ગયા

નવી દિલ્હીઃ એનએસજીમાં સ્થાન મેળવવાથી ભારત વંચિત રહ્યું છે, પણ મિસાઇલ ટેકનોલોજી કનટ્રોલ રેજિમ (એમટીસીઆર) દેશોમાં તે સ્થાન મેળવવામાં સફળ રહ્યો છે. ભારતના વિદેશસચિવ એસ. જયશંકરે સોમવારે આ સંધિ પર હસ્તાક્ષર કર્યા હતા.
મહત્ત્વની વાત એ છે કે ભારતને સતત આડખીલીરૂપ બનનાર વિકૃત મનોદશા ધરાવતા પાકિસ્તાન અને ચીનને આ જૂથમાં સ્થાન મળ્યું નથી. આ બંને દેશોને સણસણતો તમાચો પડ્યો હોય તેમ વૈશ્વિક કૂટનીતિમાં સોમવારે નવો વળાંક આવ્યો હતો.
આ શક્તિશાળી જૂથમાં ભારતને સ્થાન મળતાં તે હવે અમેરિકા પાસેથી પ્રેડટર ડ્રોન ખરીદી શકશે. ૨૦૦૪ બાદ ભારત પહેલો દેશ બન્યો છે જેને આ જૂથમાં પ્રવેશ મળ્યો છે. ૨૦૦૪માં બલ્ગેરિયાને આ જૂથમાં સ્થાન અપાયું હતું.
ચીનની એમટીસીઆર જૂથમાં પ્રવેશની અરજી આઠ વર્ષ પહેલાં ફગાવી દેવાઇ હતી. હવે ફરીથી ચીન કે પાકિસ્તાન આ જૂથમાં પ્રવેશ માટે અરજી કરે તો તેને સમર્થન આપવું કે નહીં તે અંગે નિર્ણય કરવામાં ભારતની ભૂમિકા મહત્ત્વની રહેશે.