નવી દિલ્હી: કેરળમાં ચોમાસાના ત્રણ દિવસ પૂર્વે જ આગમન થતાં હવામાન વિભાગે ચોમાસા માટે નવું પૂર્વાનુમાન જારી કર્યું છે. આઇએમડીના અનુસાર આ વર્ષે ચોમાસામાં મેઘો મન મૂકીને વરસશે. ચોમાસામાં આ વર્ષે 103 ટકા જેટલો વરસાદ થવાનું અનુમાન છે. હવામાન વિભાગ દ્વારા પ્રસિદ્ધ કરાયેલા નવા પૂર્વાનુમાનમાં કહેવાયું છે કે આ વર્ષે સરેરાશ કરતાં વધારે વરસાદ થશે.
આઈએમડીના ડિરેક્ટર જનરલ મૃત્યુજંય મહાપાત્રાએ કહ્યું હતું કે આ વર્ષે ચોમાસામાં સરેરાશ 103 ટકા વરસાદ પડવાની સંભાવના છે. આ પહેલા એપ્રિલમાં પ્રસિદ્ધ થયેલા પૂર્વાનુમાનમાં કહેવાયું હતું કે આ વખતે ચોમાસું સામાન્ય રહેશે અને લાંબા ગાળે સરેરાશ 99 ટકા વરસાદ થશે. ચોમાસું કેરળ અને તામિલનાડુના કેટલાક વિસ્તારોમાં આગળ વધતું જોવા મળ્યું હતું પણ તેની ઝડપ ધીમી પડવાની સંભાવના છે.
