નવી દિલ્હીઃ રાષ્ટ્રીય સ્વયંસેવક સંઘ (આરએસએસ) શતાબ્દીના આરે પહોંચ્યો છે તે પ્રસંગે સરસંઘચાલક મોહન ભાગવતે કહ્યું હતું કે આરએસએસનો સાર આપણી પ્રાર્થનાની છેલ્લી પંક્તિમાં રહેલો છે, જેનું આપણે દરરોજ પુનરાવર્તન કરીએ છીએઃ ભારત માતા કી જય... ‘100 વર્ષ કી સંઘ યાત્રાઃ નઇ ક્ષિતિજ’ કાર્યક્રમને સંબોધતા સંઘના વડાએ કહ્યું કે આ આપણો દેશ છે અને આપણે તેની પ્રશંસા કરવી જોઈએ અને તેને વિશ્વમાં નંબર વન બનાવવા માટે કામ કરવું જોઈએ. આ પ્રસંગે સંઘના વડાએ હિંદુની વ્યાખ્યા આપતાં કહ્યું, ‘હિંદુ કોણ છે? જે પોતાના માર્ગ પર ચાલવામાં માને છે અને અલગ-અલગ માન્યતાઓ ધરાવતા લોકોનો આદર પણ કરે છે.’
ભાગવતે કહ્યું, ‘દુનિયા નજીક આવી ગઈ છે અને તેથી આપણે વૈશ્વિક સ્તરે વિચારવું પડશે. સ્વામી વિવેકાનંદે એક વખત કહ્યું હતું કે દરેક રાષ્ટ્રને પૂર્ણ કરવાનું એક મિશન છે. ભારતનું પણ પોતાનું યોગદાન છે. આરએસએસની સ્થાપનાનો હેતુ ભારત માટે છે, તેનું કાર્ય ભારત માટે છે, અને તેનું મહત્વ ભારતને ‘વિશ્વગુરુ’ બનવામાં રહેલું છે. સમય આવી ગયો છે કે ભારત વિશ્વમાં યોગદાન આપે.’
મોહન ભાગવતે કહ્યું, ‘ક્રાંતિકારીઓની બીજી એક લહેર આવી હતી. તે લહેરમાંથી આવા ઘણા ઉદાહરણો નીકળ્યા જે આજે પણ આપણને પ્રેરણા આપે છે. તે ક્રાંતિનો હેતુ આઝાદી પછી સમાપ્ત થઈ ગયો. સાવરકરજી તે લહેરનું રત્ન હતા. તે લહેર હવે અસ્તિત્વમાં નથી અને તેની જરૂર પણ નથી, પરંતુ તે લહેર દેશ માટે જીવવા અને મરવાની પ્રેરણા હતી. 1857ના વિદ્રોહ પછી કેટલાક લોકોએ સ્વતંત્રતા પ્રાપ્ત કરવા માટે રાજકારણને એક હથિયાર બનાવ્યું અને આ નવી લહેરનું નામ ભારતીય રાષ્ટ્રીય કોંગ્રેસ રાખવામાં આવ્યું. આમાંથી ઘણા રાજકીય પક્ષો ઉભરી આવ્યા. તેઓએ સ્વતંત્રતાનું પોતાનું લક્ષ્ય પ્રાપ્ત કર્યું. જો તે ચળવળ, તે લહેર આઝાદી પછી પણ તે રીતે પ્રકાશ પાડતી હોત જે રીતે તેને મળવી જોઈએ તો આજે ચિત્ર સંપૂર્ણપણે અલગ હોત.’
શતાબ્દીએ અનેકવિધ કાર્યક્રમો
રાષ્ટ્રીય સ્વયંસેવક સંઘે આ વર્ષે તેના સ્થાપનાના 100 વર્ષ પૂર્ણ થવાના પ્રસંગે અનેક આઉટરીચ કાર્યક્રમોનું આયોજન કર્યું છે. સંઘના મહાસચિવ દત્તાત્રેય હોસબોલેએ બેંગલૂરુમાં સંઘની અખિલ ભારતીય પ્રતિનિધિ સભાની ત્રણ દિવસીય બેઠક બાદ જણાવ્યું હતું કે આ પ્રસંગે કોઈ ઔપચારિક ઉજવણી થશે નહીં, પરંતુ વિજયાદશમી પર અનેક આઉટરીચ કાર્યક્રમો કરવામાં આવશે. ઔરંગઝેબ વિવાદ અંગે હોસબોલેએ કહ્યું કે ઔરંગઝેબ ભારતીય નૈતિકતા અને સાંસ્કૃતિક મૂલ્યોનું પ્રતિનિધિત્વ કરતા નથી. બીજા પ્રશ્નના જવાબમાં તેમણે કહ્યું કે ધર્મ આધારિત અનામત ગેરબંધારણીય છે અને તેને અનેક અદાલતોમાં રદ કરવામાં આવી છે.
હોસબોલેએ એમ પણ જણાવ્યું હતું કે આજે સભામાં સ્વાતંત્ર્ય સેનાની ભગતસિંહ, સુખદેવ અને રાજગુરુને તેમના શહીદ દિવસ પર તેમજ પોર્ટુગીઝ સામે લડનાર ઉલ્લાલની રાણી અબ્બક્કાને શ્રદ્ધાંજલિ આપવામાં આવી હતી. કર્ણાટકમાં તેમની 500મી જન્મજયંતિ ઉજવવામાં આવી રહી છે.
