નવી દિલ્હીઃ હરિયાણા અને મહારાષ્ટ્ર વિધાનસભા ચૂંટણી પરિણામમાં આ વખતે પહેલી વખત એક વસ્તુ ગેરહાજર રહી. જે હતી વિપક્ષો દ્વારા ભાજપ પર ઈવીએમ મામલે થતા આરોપો. સામાન્ય રીતે દરેક વખતે ચૂંટણી પરિણામ બાદ વિપક્ષો ભાજપ પર ઈવીએમમાં ગરબડ કરી હોવાના મામલે પ્રશ્નો કરતા રહેતા હોય છે પરંતુ આ વખતે પહેલી વાર ચૂંટણી પરિણામ બાદ આવા કોઈ આરોપો સાંભળવા નથી મળ્યા. છેલ્લા કેટલાક સમયથી દરેક ચૂંટણી બાદ આવી ફરિયાદો સાંભળવા મળતી જ હતી. પરંતુ આ વખતે પહેલી વખત ઈવીએમ પર એક પણ વિપક્ષે આંગળી નથી ચીંધી. નોંધનીય છે કે હરિયાણામાં કોંગ્રેસનું પ્રદર્શન સારું રહ્યું છે અને મહારાષ્ટ્રમાં વિપક્ષી પક્ષોએ ધાર્યા કરતા વધારે મજબૂત સ્થિતિ પ્રાપ્ત કરી છે.
ઈવીએમ ટેક્નોલોજી પક્ષોના જાણકાર એક વ્યક્તિએ જણાવ્યું કે, ‘ચૂંટણી પરિણામો માટે ઈવીએમ સાથે ચેડા કરનારા લોકો કર્ણાટક, મધ્યપ્રદેશ અને રાજસ્થાનના પરિણામો પછી પણ મૌન જ રહ્યા હતા. હરિયાણા અને મહારાષ્ટ્રની ચૂંટણી પરિણામે પણ સાબિત કરી દીધું છે કે ઈવીએમ હેક કરવાની વાત સદંતર ખોટી છે, કારણકે ઈવીએમ મશિન કોઈનાથી પણ હેક થઈ શકે તેમ નથી.’
