કોરોના સંક્રમણ વધતા ૩૧ જાન્યુઆરી સુધી અંબાજી મંદિર સહિત દેવસ્થાન ટ્રસ્ટ સંચાલિત મંદિરો બંધ રહેશે

પાલનપુરઃ સુપ્રસિદ્ધ યાત્રાધામ અંબાજી મંદિર કોરોના સંક્રમણને લઈને ૨૨ જાન્યુઆરીથી ૩૧ જાન્યુઆરી સુધી દર્શનાર્થીઓ માટે બંધ રાખવાનો નિર્ણય લેવાયો છે. નોંધનીય છે કે અંબાજી મંદિર, ગબ્બર શક્તિપીઠ સહિત અંબાજી દેવસ્થાન ટ્રસ્ટ સંચાલિત તમામ મંદિરો બંધ કરવાનો નિર્ણય લેવાયો છે.
સમગ્ર દેશમાં કોરોનાની બીજી લહેર બાદ કોરોનાની ત્રીજી લહેરમાં ઝડપથી સંક્રમણ વધી રહ્યું છે. જેમાં ગુજરાતમાં પણ પ્રતિદિન કોરોના પોઝિટિવ કેસોમાં સતત વધારો થતો જોવા મળી રહ્યો છે. બનાસકાંઠા જિલ્લામાં કોરોના પોઝિટિવના કેસ એક હજારની નજીક પહોંચ્યા છે. ત્યારે સુપ્રસિદ્ધ યાત્રાધામ અંબાજીમાં અગમચેતીના ભાગરૂપે સંક્રમણ ન ફેલાય તે હેતુથી વ્યવસ્થાપક સમિતિ દ્વારા આ નિર્ણય લેવાયો છે. જેમાં અંબાજી મંદિર, ગબ્બર શક્તિપીઠ સહિત ૫૧ શક્તિપીઠ પરિક્રમા માર્ગના મંદિરો તેમજ દેવસ્થાન ટ્રસ્ટ સંચાલિત પેટા મંદિરો ૨૨ જાન્યુઆરીથી ૩૧ જાન્યુઆરી સુધી દર્શનાર્થીઓ માટે બંધ રાખવાનો નિર્ણય કરવામાં આવ્યો છે.
નોંધનીય છે કે સોશિયલ મીડિયાના માધ્યમથી સવાર-સાંજ આરતીનું જીવંત પ્રસારણ કરવામાં આવશે. આરાસુરી અંબાજી માતા ટ્રસ્ટ તથા જિલ્લા વહીવટી તંત્ર દ્વારા બનાસકાંઠાના સર્વે લોકોને ઘરે બેઠા જીવંત પ્રસારણનો લાભ લેવા અપીલ કરવામાં આવી છે.