ભુજઃ દેશની આંતરરાષ્ટ્રીય સમુદ્રી અને જમીન સરહદે આવેલા કચ્છ જિલ્લાના પશ્ચિમ દરિયાઈ હરામીનાળા ક્રિક વિસ્તારમાંથી ફરી એક વખત પાડોશી દેશ પાકિસ્તાનની એક માચ્છીમારી બોટ સીમા સુરક્ષા દળના જવાનોને બિનવારસી હાલતમાં મળી આવી છે. માછલી પકડવાના સાધનો સિવાય કોઇ સંદિગ્ધ વસ્તુ દળના જવાનોને જોવા મળી નથી પરંતુ ઘુશળખોર છુપાયા હોવાની આશંકાએ અટપટ્ટા ક્રિક વિસ્તારમાં BSF દ્વારા સઘન તપાસ ચાલી રહ્યાનું પ્રાથમિક ધોરણે જાણવા મળ્યું છે.
આ અંગે પ્રાપ્ત પ્રાથમિક માહિતી મુજબ લખપત તાલુકાના દરિયાઈ હરામીનાળા ક્રિક વિસ્તારમાં કચ્છ બોર્ડર સિક્યોરિટી ફોર્સના જવાનોને વહેલી સવારે પેટ્રોલિંગ દરમ્યાન એક પાકિસ્તાની બોટ બિનવારસી હાલતમાં મળી આવી હતી. બોટમાંથી માછલી પકડવાની જાળી સહિતની સામાન્ય સામગ્રી હાથ લાગી છે. જોકે બોટ સાથે આવેલા ઘુસણખોર હજુ પણ આપણી સરહદ અંદર છુપાયા હોવાની આશંકાએ દળના જવાનો દ્વારા તલાસ કરવામાં આવી રહી છે. ઉલ્લેખનીય છે કે કચ્છની પશ્ચિમ દરિયાઈ સરહદ પર પાકિસ્તાની બોટ અને ઘુસણખોર પકડવાની ઘટના સમયાંતરે બનતી રહે છે.