વડીલો સહિત સહુ વાચક મિત્રો, જીભ કચરાય ત્યારે મન કચવાય એ માણસમાત્રની પરખ છે. સોમવારે શ્રીમાન ડોનાલ્ડ ટ્રમ્પ અમેરિકાના 47મા પ્રેસિડેન્ટ બન્યા. સોગંદવિધિ સંપન્ન થઇ. નવા પ્રેસિડેન્ટને, અમેરિકાની પ્રજાને અને સાથે સાથે જ વિશ્વ સમસ્તને આપણી ઘણી ઘણી શુભકામનાઓ હોય તે સ્વાભાવિક છે.
મારા-તમારા જેવા સામાન્ય માણસોની જીભ પણ ક્યારેક કચરાતી હશે, અને જ્યારે આવું થતું હશે ત્યારે જીવ પણ કચવાતો હશે, પણ ડોનાલ્ડ ટ્રમ્પની વાત અલગ છે. આ માણસની જીભ વારંવાર કચરાતી રહે છે તે આપણે સહુએ જોયું-જાણ્યું છે. ન બોલવાનું બોલવું, અઘટિત બોલી નાંખવું, વધારે પડતું બોલી નાંખવું... આ જ ટ્રમ્પ સાહેબના વ્યક્તિત્વની આગવી ઓળખ છે. બમ્બૈયા ફિલ્મી ભાષામાં તો કહું તો તેઓ ‘બોલ બચ્ચન’ છે. તો એક વર્ગ કહે છે કે તેમની જીભ અતરડા જેવી છે. તેમના મોંમાંથી નીકળતા શબ્દો ધારે ત્યારે સામેવાળાને રહેંસી નાંખે છે.
