વેસ્ટ ઇન્ડિઝ સામે થયેલા કારમા પરાજય બાદ હતાશ થયેલા ઇંગ્લેન્ડના સુકાની જોઈ રુટે ટેસ્ટ ટીમના સુકાનીપદેથી રાજીનામું આપી દીધું છે. રુટ છેલ્લા પાંચ વર્ષથી ટેસ્ટ ટીમનું નેતૃત્વ કરી રહ્યો હતો. ઈંગ્લેન્ડ માટે ટેસ્ટ કેપ્ટન તરીકે સૌથી વધુ મેચ રમવાનો અને જીતવાનો રેકોર્ડ રૂટના નામે છે. રુટે ઈંગ્લેન્ડ ટેસ્ટ ટીમ માટે 27 ટેસ્ટ મેચ જીતીને માઈકલ વોન (26), સર એલિસ્ટર કૂક (24) અને સર એન્ડ્રુ સ્ટ્રોસ (24)ને પાછળ છોડી દીધા છે. તેણે કેપ્ટનશીપ છોડવાની જાહેરાત કરતાં કહ્યું હતું કે મારા દેશની કેપ્ટનશીપ કરવાનું મને ખૂબ જ ગર્વ છે અને હું છેલ્લા પાંચ વર્ષને ખૂબ ગૌરવ સાથે નિહાળીશ. ઈંગ્લેન્ડ ક્રિકેટના કસ્ટોડિયન તરીકે સેવા આપવી એ સન્માનની વાત છે.
