લંડનઃ ઓફજેમે પ્રાઇસ કેપમાં ઘટાડો કર્યા પછી 1 ઓક્ટોબરથી બ્રિટનમાં મોટાભાગના ઘરો માટે એનર્જી બિલ 7 ટકા ઘટીને સરેરાશ £1,923 પ્રતિ વર્ષ થશે. અત્યાર સુધી વાર્ષિક £2,074ની પ્રાઇસ કેપ અમલમાં હતી. પ્રાઇસ કેપમાં ઘટાડાના પગલે સામાન્ય એનર્જી બિલો 18 મહિનાના સૌથી નીચા સ્તરે પહોંચશે. આનો અર્થ એ છે કે સામાન્ય પરિવાર માટે વાર્ષિક એનર્જી બિલમાં £151 પ્રતિ વર્ષ ઘટી શકે છે. જોકે નિષ્ણાતોએ આગાહી કરી છે કે જાન્યુઆરીની શરૂઆતમાં પ્રાઇસ કેપ વધીને વાર્ષિક £2,000થી ઉપર જઇ શકે છે.
ગ્રાહક જૂથોએ ચેતવણી આપી છે કે જ્યાં સુધી સરકાર વધુ સહાય નહીં આપે ત્યાં સુધી લાખો પરિવારોને આ શિયાળામાં તેમના બિલ ચૂકવવા માટે સંઘર્ષ કરવો પડશે. ઓફજેમના ચીફ એક્ઝિક્યુટિવ જોનાથન બ્રેઅરલીએ જણાવ્યું હતું કે: “પ્રાઈસ કેપમાં સતત ઘટાડો થઈ રહ્યો છે તે આવકારદાયક સમાચાર છે, જો કે, અમે જાણીએ છીએ કે લોકો જીવનનિર્વાહના પડકારોના વ્યાપક ખર્ચ સાથે સંઘર્ષ કરી રહ્યા છે અને હું કોઈ ખાતરી આપી શકતો નથી કે આ શિયાળામાં કિંમતો હળવી થશે.
2021 ના અંતથી જથ્થાબંધ ગેસ અને પાવરના ભાવમાં વધારો થવાને કારણે એનર્જી પ્રાઈસ કેપમાં સતત વધારો થયો હતો, જે 2021-22ના શિયાળા માટે વાર્ષિક £1,277 થી વધીને એપ્રિલ 2022 થી વાર્ષિક £1,977 થઈ ગયો હતો. ત્યારબાદ ગયા શિયાળામાં પ્રાઇસ કેપ આટલા ઊંચા સ્તરે પહોંચી હતી. કે સરકારે ઉર્જા કિંમત ગેરંટી દ્વારા બિલોને સબસિડી આપવા ફરજ પડી હતી. એક સામાન્ય ઘરગથ્થુ બિલને ઓક્ટોબર 2022 થી જૂન 2023 સુધી પ્રતિ વર્ષ £2,500ના રેકોર્ડ ઊંચા સ્તર સુધી મર્યાદિત કરી દીધું. આ સબસિડી વિના બિલ વાર્ષિક £4,279 ની ઊંચી સપાટીએ પહોંચી ગયા હોત.
