લંડનઃ બર્મિંગહામમાં 12 વર્ષના વિદ્યાર્થીને લાફો મારવા માટે દોષી ઠરેલા બ્રિટિશ શીખ મહિલા અધિકારી શરણજિત કૌરને બર્મિંગહામ મેજિસ્ટ્રેટ કોર્ટ દ્વારા 12 મહિનાની કોમ્યુનિટી સેવાની સજા અપાઇ છે. ઇન્ડિપેન્ડન્ટ ઓફિસ ફોર પોલીસ કન્ડક્ટ દ્વારા કરાયેલી તપાસમાં આરોપ મૂકાયા બાદ શરણજિત કૌરે ગયા મહિને વેસ્ટ મિડલેન્ડ્સ પોલીસ કોન્સેટબલ પદેથી રાજીનામુ આપ્યું હતું.
આઇઓપીસીના રિજિયોનલ ડિરેક્ટરે જણાવ્યું હતું કે, પોલીસ અધિકારી જરૂરી હોય, વ્યાજબી સંજોગ હોય તો જ બળપ્રયોગ કરી શકે છે. એક 12 વર્ષના વિદ્યાર્થીને લાફો મારવા માટે આ પોલીસ અધિકારી પાસે કોઇ કારણ નહોતું. આ બાળક તેમના માટે જોખમી ન હતો.